Аколь

Аколь (ґен. аклю мн. аклї) од мадяр. akol(y), мадяре превжали слово од панонских Славянох около, укр. диял. окiл а значи ,,место оградзене зоз колїками"

Слово и поняце аколь (чaсто як колоквиялни вираз, або варияция реґионализма околь /окор-около) то место у традицийним валалским обисцу и будовательстве означує специфични помоцни обєкт – найчастейше то импровизована, дочасова або єдноставна валалска шопа- лєтни хлїв, хторей основна характеристика тота же є прекрита зоз сламу. Прето ше часто вола и сламяна шопа. Таки обєкт- аколь ма даскельо важни прикмети у традицийним валалским ґаздовстве.

Окруженє и конструкция

Аколь то место дзе зоз слупами и дручками оградзене место за крави през лєто (серб. тор). У составе, у кругу аклю на салашу, звичайно була и сламяна шопа. Могло ше аколь и сламяну шопу видзиц и по обисцох у заднїм дворе, кед же було надосц простору направиц таку шопу. Такей „отвореней шопи” закрице було углавним прикрите зоз сламу. Слама була барз добри, тунї и лєгко доступни природни материял и изолатор. Закрице важне за статок же би их защицело од моцного слунка, дижджу, витру и шнїгу (статок хтори може буц през жиму вонка).

Под таку шопу були привязани крави (звичайно вноци). На жеми у аклю под сламяну шопу на єдней часци була розпрестарта слама, а з часом и ґаженьом по тей слами, слама ше претваряла до гною. През дзень крави були одвязани и рушали ше шлєбодно по аклю, а тота сламяна шопа найчастейше служела же би кравом през лєто нє було барз горуцо у завартим хлїве.

У орґанизованих просторох виховйованя коньох т.є. ерґелох тиж направени аклї у хторих ше конї шлєбодно (нє повюзани су) тримаю. Конї пребуваю у акльох найчастейше влєце през дзень.

Економска вредносц: Понеже сламяни шопи правени зоз секундарних сировинох зоз власних польових културох, остатки зоз житней слами, або иншого подобного материялу (та и наду), аклї представяли швидке и економичне ришенє за ширенє капацитета валалского ґаздовства без вельких укладаньох до твардого будовательного материялу (камень, цегли або древо).

У нєшкайшим чаше аколь и сламяни шопи такого типа подполно нєстали, нє правя ше и нє хасную. Углавним ше споминаю у рамикох етнолоґийних виглєдованьох и чуваня народного ґаздовства.

Литература

• Словнїк руского народного язика А-Н Нови Сада 2017, бок 28